Mario Puddu est unu de pigai a essempru. No seus fueddendi (cun totu s’arrespetu) de Mario Puddu su sindigu de Assemini. Seus fueddendi de Mario Puddu de Illorai, de medas annus in Santu Giuanni Suergiu.
Seus fueddendi de unu òmini simpri, no fillu de arricus, cun d-unu trabballu simpri (professori in sa scola). Unu òmini chi no s’est mai incrubau a nemus, pruschetotu a su Stadu italianu chi, comenti a is Savoia a is spanniolus, est tentendi de sperdi is sardus. A dolu mannu nci funt arrennescendi.
Sa primu cosa de sperdi, biu chi no podis bociri totu is sardus, est de sperdi sa lìngua sarda. Mario Puddu at detzìdiu de gherrai po no sperdi sa lìngua. At detzìdiu de ddu fai dònnia dii. De s’inghitzu de is annus otanta, est a nai 45 annus a oi, trabballat a su “Ditzionàriu de sa limba e de sa cultura sarda”, impari a milli àteras atividadis.
Su Ditzionàriu est una de is prendas prus manna e bellas de sa Sardìnnia de is ùrtimus 100 annus, chi si podit imperai, lìbberu, fintzas in s’arretza. Mario Puddu est unu òmini chi no tenit meda, e chi perou est generosu. Cun su “Ditzionàriu” at fatu a solu una òpera, de amellorai, chi imparis is universidadis de Casteddu e Tàtari no ant fatu.
Mario Puddu at ammostau chi depeus fai a solus, chi serbit, comenti sardus, e chi ddu podeus fai: cun generosidadi, unidadi, amori.
S’atòbiu de su 23 de maju bolit essi custu. Boleus afestai a issu, po afestai sa genti comenti a issu. Sardìnnia tzerriat Sardìnnia dd’at a donai sa tessera onorària costa nosta. S’iat a praxi chi àteras organitzatzionis fetzant su pròpriu. No est una cosa po nosu. Est una cosa po is scientis chi funt fendi cursus de sardu (benei totus!), e po totus is chi stimant su sardu. Benei a afestai a Mariu, po afestai a nosu etotu.
Eus a contai sa vida spantosa chi at tentu, is batallas, is òperas. E su benidori!
Si bieus de is 10:30 de mengianu, in s’aposenteddu, in bia Enrico Toti 49 in Pirri, Casteddu. Si podit fintzas papai innia: si prenotai po su pràngiu prenei custu mollu innoi
Author: Enrico Lobina
Avoloteri